Hagar mega ekki heita Hagar

Neytendastofa hefur bannað Högum hf., sem reka bæði Bónus, Hagkaup og 10-11 ásamt fjölda fataverslana, að nota nafnið Hagar. Það var heildsalan Hagi ehf. sem kvartaði til stofnunarinnar og vísaði meðal annars til þess að Hagi hefði verið stofnað og skráð hjá fyrirtækjaskrá 1993 en Baugur Ísland hf. hefði breytt nafni sínu í Hagar hf. árið 2003.

Eftir að viðræður um kaup á firmanafninu Hagi ehf. báru ekki árangur hélt Baugur Ísland hf. áfram að nota nafnið Hagar. Kvartaði Hagi því til Samkeppnisstofnunar og taldi notkun Haga á firmanafninu ganga gegn ákvæði samkeppnislaga um óréttmæta viðskiptahætti þar sem ruglingshætta á firmanöfnunum væri veruleg. Þótt fyrirtækin ættu ekki í samkeppni yrði Hagi fyrir miklum óþægindum vegna þess hve lík nöfnin væru.

Með breytingum sem urðu á lögum tengdum samkeppnismálum tók Neytendastofa við erindinu og í úrskurði sínum bendir stofnunin á að orðmynd heitanna sé sú sama í þolfalli og eignarfalli. Það eina sem greini þau að í þeim tilfellum sé skammstöfunin sem gefi til kynna að annað sé einkahlutafélag en hitt hlutafélag.

Taldi Neytendastofa hafa verið sýnt fram að ruglingur hefði átt sér stað milli aðila þannig að póstsendingar hefðu ratað á rangan stað og aðilar ruglast á fyrirtækjunum í tengslum við fjölmiðlaumræðu. Var það því mat Neytendastofu að notkun Haga hf. á firmanafninu Hagar hf. væri brot á samkeppnislögum og Högum því bannað að nota nafnið Hagar.