Struku úr fangelsi og náðust á stolnum bíl

Þrjú ungmenni struku úr fangelsinu á Akureyri í kvöld en náðust skömmu síðar á stolnum bíl í Varmahlíð. Ungmennin, sem eru öll um tvítugt, voru í dag úrskurðuð í gæsluvarðhald fram á föstudag í Héraðsdómi Norðurlands eystra.

Lögreglan á Akureyri segir ekki ljóst hvernig þeim tókst að sleppa úr fangelsinu en þau komust út um átta leytið í kvöld. Tæpum tveimur tímum síðar eða laust fyrir klukkan tíu náði lögreglan þeim í Varmahlíð. Ungmennin voru handtekin á Akureyri í gær ásamt tveimur öðrum en þau eru grunuð um bílþjófnaði, innbrot og fjársvik með greiðslukortum. Máli tveggja ungmennanna er lokið og voru þau látin laus á hádegi í dag. Flest þeirra eiga langan afbrotaferil að baki.