Jagger svaf hjá nýráðinni barnapíu

Það tók sjónvarpsbarnapíuna Claire Verity ekki nema nokkra tíma að sofa hjá rokkaranum Mick Jagger eftir að hún hafði verið ráðin til að gæta sonar hans. Þetta upplýsir hún í viðtali við breska blaðið News of the World í dag.

Claire hafði verið ráðin af Jerry Hall, eiginkonu Jaggers, til að gæta sjö mánaða gamals sonar þeirra Gabriels. Það skipti Jagger engu máli þótt kona hans væri í næsta herbergi að leika við son þeirra því hann greip fyrsta tækifæri sem bauðst í eldhúsi hótelsvítunnar sem þau dvöldu á.

"Þetta gerðist hratt. Hann kom inn í eldhúsið og nokkrum sekúndum síðar vorum við byrjuð að kyssast. Við höfðum síðan mök og skömmu seinna var það búið. Hann var greinilega vanur þessu því skömmu seinna var hann byrjaður að leika við son sinn í næsta herbergi," segir Claire sem stjórnar nú vinsælum uppeldisþætti í breska sjónvarpinu.

Þessi orð Claire koma varla á óvart því Jerry Hall fór fram á skilnað fyrir nokkrum árum eftir að upp komst um leynilegt ástarsamband Jaggers og brasilískrar fyrirsætu.