Umhverfisverndarsinnar þinga

„Þarna verða fyrirlesarar frá 15 löndum, meðal annars prófessor í loftlagsbreytingum frá Kanada sem hefur verið í forsvari fyrir nefnd Sameinuðu þjóðanna um loftlagsbreytingar,“ segir Sigurður Harðarson, skipuleggjandi ráðstefnunnar Hnattrænar afleiðingar stóriðju og stórstíflna, sem er haldin nú um helgina.

Fjallað verður um stöðuna á Íslandi og hún tengd við það sem er að gerast annars staðar á hnettinum.

„Það sama er að gerast úti um allan heim. Þetta eru sömu fyrirtækin sem eru að vinna hér og úti í heimi.“ Sigurður er uggandi yfir mögulegri yfirtöku Alcoa á samkeppnisfyrirtækinu Alcan. „Þegar fyrirtæki eru orðin svona stór geta þau haft rosaleg áhrif á svona lítið efnahagskerfi eins og það íslenska.“

Auk erlendu umhverfisverndarhópanna verða rithöfundarnir Andri Snær Magnason og Guðbergur Bergsson með framsögur. Ómar Ragnarsson, Guðmundur Beck, fyrrum bóndi að Kollaleiru í Reyðarfirði, og fulltrúar hinna mörgu íslensku umhverfisverndar samtaka munu einnig flytja erindi.

Frítt er inn á ráðstefnuna sem stendur frá kl. 11 til 18 báða dagana. Nánari upplýsingar má finna á Savingiceland.org og Hotel-hlid.is.