Meiri þrældómur Þórhalls

Gleði Þórhalls Gunnarssonar með hina nýju stöðu var tvíbent þegar Fréttablaðið náði af honum tali.

„Þetta þýðir meiri þrældóm. Ef ég ætla að stýra Kastjósinu áfram og bæta þessu við mig. En við sjáum til,“ segir Þórhallur.

Aðspurður hvort þetta hafi verið lengi í deiglunni segir hann að það taki til nokkurs tíma. Og rifar upp fyrir blaðamanni slúður sem Fréttablaðið birti einmitt um að þetta stæði til – að hann tæki við þessari tilteknu stöðu.

Þórhallur segir breytinga að vænta sem komi þá fram í haust. En tíma taki að átta sig á því úr hverju þeir hjá RÚV hafi að moða.

Með vísan til þess að Þórhallur er lærður leikari segir hann drauminn að vinna meira leikið efni, ef fjármagn sé til staðar, og með vísan í mastersgráðu hans þá segist Þórhallur einfaldlega vilja halda áfram að búa til gott sjónvarp.

„Ég veit hins vegar ekki hvað mínum nánustu finnst um þetta. Ég verð enn meira burtu frá heimili mínu og hef þó verið mikið frá. Ég verð að koma mér upp íbúð hérna í Útvarpshúsinu,“ segir Þórhallur.