París las Biblíuna og hugleiddi

Paris Hilton var læst í 10 fermetra stórum fangaklefa í 23 klukkustundir á dag í þær rúmu þrjár vikur sem hún mátti dúsa í fangelsi í Los Angeles. Stærstan hluta þess tíma eyddi hún í að lesa Biblíuna, stunda hugleiðslu og ákveða hvernig hún gæti notað reynsluna innan múranna til að koma lífi sínu á réttan kjöl.

Þetta sagði Paris í viðtali við spjallþáttastjórnandann Larry King í gær, en um var að ræða fyrsta viðtalið sem hótelerfinginn veitti eftir að hafa verið sleppt úr haldi fyrr í vikunni.

„Ég átti ekki skilið að fara í fangelsi en ég hef lært mína lexíu. Framvegis mun ég framfylgja lögunum og haga mér vel. Ég hef þroskast. Ég er 26 ára gömul, orðin fullorðin og ég vill vera ábyrgðarfull,“ sagði Paris.

Hún segir það hafa verið „skelfilegt“ að þurfa að dúsa í fangelsi í 23 daga, sérstaklega í ljósi þess að hún þjáist af innilokunarkennd og kvíðaköstum. „Upphafið var erfiðast en síðan ákvað ég að reyna að líta á björtu hliðarnar á málunum. Og þá gekk þetta strax betur.“ Og um mánudaginn þegar Paris var sleppt sagði hún: „Þetta var besti dagur lífs míns.“