Kom Ladda í opna skjöldu

Björgvin Halldórsson afhenti vini sínum til margra ára, Ladda, tvær gullplötur á lokasýningu hans, Laddi 6-tugur, í Borgarleikhúsinu í gærkvöldi.

Björgvin kom Ladda í opna skjöldu með uppátækinu í lok sýningarinnar, sem hefur aftur göngu sína í haust. „Við erum gamlir og góðir vinir og höfum unnið mikið saman. Sena bað mig um að vera þeirra fulltrúi og afhenda plöturnar fyrir þessi afrek. Bæði fyrir plötuna Hver er sinnar kæfu smiður, sem er búin að fá frábærar móttökur, og eina stóra gullplötu þar sem flest allar plöturnar sem hann hefur gert eru á,“ segir Björgvin, sem er um þessar mundir að ljúka upptökum fyrir plötuna Íslandslög 7.

Laddi hafði fyrir mörgum árum fengið gullplötur fyrir eldri plötur sínar en þær voru aftur á móti hluti af búslóð hans sem brann á Laugaveginum á sínum tíma. Því var ákveðið að nota tækifærið í gærkvöldi og afhenda honum gullplöturnar aftur.

„Laddi er bara gullmoli. Það er gaman að svona sýning nær svo mikilli hylli þegar leikhúsin eru svolítið önnum kafin við það að bjóða upp á einhverja hámenningu. Ég tel þetta vera hámenningu hjá Ladda og líka alþýðumenningu. Þegar hann kemur með sýninguna sína slær hann allri klassíkinni við,“ segir hann.

Sýning Ladda í gærkvöldi var sú 45. í röðinni og alls hafa um 25 þúsund manns komið að sjá þennan mikla grínmeistara. „Það er verið að klappa honum ærlega á bakið,“ segir Björgvin. „Við gerðum fjórar plötur saman með HLH-flokknum og ég „pródúseraði“ þrjár sólóplötur hans. Við höfum unnið saman á tíu plötum og erum búnir þekkjast frá því í æsku í Hafnarfirðinum. Allir flottustu gæjarnir eru úr Hafnarfirði.“