Bardagamenn safna undirskriftum

Meðlimir bardagaklúbbsins Mjölnis standa nú fyrir undirskriftasöfnun á netinu til að sýnt verði frá keppnum í blönduðu bardagaíþróttinni MMA, eða Mixed Martial Arts. Að sögn Ólafs Vals Ólafssonar, meðlims Mjölnis, er áskoruninni beint að sjónvarpsstöðinni Sýn en um 200 manns hafa skrifað undir á þeirri viku sem söfnunin hefur staðið yfir.

„Þetta eru helst meðlimir Mjölnis og aðstandendur þeirra sem hafa skrifað undir en við finnum fyrir miklu meiri áhuga fyrir MMA í samfélaginu. Við stefnum að því að ná 1.000 undirskriftum sem vonandi verður nóg til að sannfæra Sýnarmenn,“ segir Ólafur Valur.

„Sýn hefur staðið sig mjög vel í boxinu en það er einfaldlega svo lítið að gerast þar núna. Það er enginn Tyson, De la Hoya er búinn á því og Prinsinn er ekki til. Nú er tíminn til að kynna landsmenn fyrir einhverju nýju,“ segir Ólafur Valur og bendir máli sínu til stuðnings á að keppni í MMA er mun vinsælla sjónvarpsefni en hnefaleikar í Bandaríkjunum. „Það er mikið um að fólk sé að sækja þetta efni á netinu og horfa á í tölvunni og við erum sannfærðir um að það er markaður fyrir þetta hér.“

Allar upplýsingar um MMA má finna á Mjölnir.is