Auðkýfingur kaupir hlut í galleríi í miðborginni

„Þetta er nú engin stóreflisfjárfesting. Það er mikill listaáhugi í fjölskyldunni og þess vegna tókum við þátt í þessu," segir auðkýfingurinn Sindri Sindrason, hluthafi og stjórnarmaður í Actavis, sem ásamt fjölskyldu sinni hefur keypt stóran hlut í Gallerí Turpentine við Ingólfsstræti. Kaupverðið er ekki gefið upp en samkvæmt upplýsingum Fréttablaðsins hleypur það á tugum milljóna króna.

Sveinn Þórólfsson, aðaleigandi gallerísins, vildi lítið tjá sig um málið við Fréttablaðið en ljóst er að með tilkomu Sindra og fjölskyldu í eigendahópinn verður til fjármagn sem ætti að geta aukið enn frekar á ört vaxandi hróður gallerísins. Og sjálfur útilokar Sindri ekki að Turpentine muni stækka við sig á næstunni. „Eru menn ekki alls staðar að reyna að stækka og gera betur?"

Að sögn eiginkonu Sindra, Kristbjargar Sigurðardóttur, hefur það lengi blundað í fjölskyldunni að koma að slíkri starfsemi. „Við höfum verið viðskiptavinir hjá Turpentine og höfum heillast af þeirri starfsemi sem þarna hefur verið í gangi. Þetta er glæsilegt gallerí og býður upp á mikla möguleika," segir Kristbjörg.

Ingunn Dögg, dóttir þeirra hjóna, er menntuð í forvörslu frá Flórens á Ítalíu og mun koma mikið að starfi Turpentine í nánustu framtíð og svo er sonurinn Sindri Sindrason, aðstoðarmaður Jóns Ásgeirs Jóhannessonar hjá Baugi, auk þess mikill listunnandi.

Í dag er Gallerí Turpentine starfrækt í 300 fermetra húsnæði við Ingólfsstræti en það var stofnað í upphafi ársins 2005 af fyrrnefndum Sveini og Guðrúnu Gunnarsdóttur. Þau munu áfram eiga hlut í galleríinu þrátt fyrir að hafa selt hluta þess til Sindra og fjölskyldu. Margir af athyglisverðustu listamönnum þjóðarinnar sýna verk sín í Turpentine, þar á meðal Jón Sæmundur Auðarson, Steingrímur Eyfjörð, Guðrún Vera Hjartardóttir og Hallgrímur Helgason.