Íranir gagnrýna Breta fyrir að hafa heiðrað Salman Rushdie

Stjórnvöld í Íran hafa gagnrýnt bresk yfirvöld fyrir að hafa veitt rithöfundinum Salman Rushdie riddaratign. Telja írönsk stjórnvöld að með því hafi bresk yfirvöld viljandi verið að ögra og sýna öllum múslimum lítilsvirðingur. Salman Rushdie var dæmdur til dauða af múslimadómstól í Íran eftir að hann gaf út bókina "Söngvar Satans" árið 1989.

Mohammad Ali Hosseini, talsmaður íranska utanríkisráðuneytisins, sagði á blaðamannafundi í dag að með því að veita einum hataðasta manni meðal múslima riddaratign hafi bresk yfirvöld viljandi verið að ögra múslimum. „Þetta sýnir, svo ekki verður um villst, neikvæða afstöðu breskra yfirvalda gagnvart múslimum," sagði Hosseini.

Elísabet Englandsdrottning veitt Salman Rushdie riddaratign í gær. Talsmaður breska utanríkisráðuneytisins vísaði ásökunum Hosseini á bug og sagði Rushdie væri vel að sinni nýju tign kominn. Í því fælist hins vegar engin afstaða breskra stjórnvalda gagnvart múslimum.