Mömmur mega loks taka þátt í Ungfrú Spánn

Stjórn fegurðarsamkeppninnar Ungfrú Spánn hefur tekið út ákvæði í reglum keppninnar sem kveður svo á að mæðrum sé óheimilt að taka þátt.

Hin 22 ára móðir Angela Bustillo skráði sig í keppnina sem fór fram í janúar á þessu ári. Hún vissi um ákvæðið en hélt að þetta væru margra áratuga gamlar reglur sem ætti eftir að endurnýja. Hún sigraði svo keppnina. Síðar uppkomst að að hún ætti son og stjórn keppninnar svipti umsvifalaust hina nýkrýndu fegurðardrottningu titlinum.

Þetta olli miklum usla í spænsku samfélagi. Allt frá femínistasamtökum til stjórnvalda Spáni létu í ljós hneykslun sína á ákvörðun stjórnarinnar. Á endanum lét stjórnin undan og breytti reglunum.