Eyjamenn ósáttir við hækkun á fargjöldum Herjólfs

Um fimm hundruð manns mótmæltu hækkunum á far- og farmgjöldum Herjólfs á Básaskersbryggju í Vestmannaeyjum. Gjöldin hækka að meðaltali um ellefu og hálft prósent.

Fólkið safnaðist saman skömmu áður en Herjólfur fór sína seinni ferð frá Vestmannaeyjum í gær. Meðan verið var að aka bílum og vögnum um borð lét hópurinn í sér heyra.

Hækkunin tók gildi í dag. Eggert Björgvinsson, forsvarsmaður mótmælanna, segir Eyjamenn ósátta við gjaldskrána sem sé ósanngjörn. Hann nefnir sem dæmi að eftir hækkun kosti tvö þúsund krónur fyrir bíl sem er fimm metrar að lengd með Herjólfi. Fyrir bíl sem aðeins er sentímeter lengri eða fimm metrar og einn sentímetri kosti hins vegar fjögur þúsund krónur eða helmingi meira.

Eimskip sér um rekstur Herjólfs samkvæmt samning við ríkið og endurspeglar gjaldskrá Herjólfs kostnað við rekstur skipsins. Hækkandi olíuverð hefur áhrif svo og hækkandi byggingarvístala og launavísitala.

Eggert segir mótmælin einkum beinast að ráðherra samgöngumála og þingmönnum kjördæmisins. Ekki sé eðlilegt að samgönguráðherra gerir samning sem feli það í sér að hægt sé að hækka gjaldskrá án þess að það komi ríkinu.

Elliði Vignisson, bæjarstjóri í Vestmannaeyjum, segir það skýrt hvað íbúar í bænum vilji en það er allsherjar endurskoðun á gjaldskrá og að Vestmannaeyingar borgi það sama fyrir notkun á þjóðvegi sínum og aðrir landsmenn.