Mills fær 8,5 milljarða

Heather Mills-McCartney fær eina stærstu skilnaðargreiðslu sögunnar þegar gengið verður frá skilnaði hennar og Pauls McCartney. Talið er að fyrirsætan fyrrverandi fái fast að tveimur milljörðum króna í byrjun og væna summu árlega héðan í frá.

Fréttir frá Bretlandi herma að stjörnuparið fyrrverandi, Bítillinn Sir Paul McCartney og fyrirsætan Heather Mills, séu loks að ná sáttum í erfiðu skilnaðarmáli sínu. Kalt stríð hefur verið þeirra á milli síðan upp úr hjónabandinu slitnaði og harðar deilur hafa farið fram milli lögfræðinga þeirra um hversu mikið McCartney þyrfti að greiða Mills til að hún yrði ánægð.

Breskir fjölmiðlar segja að skilnaðarsamningur þeirra hljóði alls upp á um 70 milljónir punda, um 8,5 milljarða íslenskra króna. Heather fái í fyrstu 1,8 milljarða króna og fast að hálfum milljarði á ári eftir það, allt þar til Beatrice dóttir þeirra nær 18 ára aldri. Á móti kemur að Heather fær engar af fasteignum Bítilsins, en hún mun hafa sótt fast að fá þær í sinn hlut. Paul McCartney mun sömuleiðis greiða fyrir allan kostnað við uppeldi dóttur þeirra.

Hvorki Heather Mills né Paul McCartney hafa viljað tjá sig um skilnaðinn undanfarið svo þessar fregnir hafa ekki fengist staðfestar. Breska dagblaðið Daily Mail telur sig þó hafa traustar heimildir fyrir að málið fari ekki fyrir dómstóla og stutt sé í að gengið verði frá sáttunum. „Fljótlega get ég farið að kalla mig Heather Mills aftur,“ er haft eftir fyrirsætunni fyrrverandi en fregnir herma að hún bíði óð og uppvæg eftir að kasta McCartney-nafninu.