„Auðvelt að vera vitur eftir á,“ segir Birkir Jón

Sigurður Þórðarson ríkisendurskoðandi segir félagsmálaráðuneytið bera ábyrgðina á eftirlitsleysi með fjárreiðum Byrgisins. Hann kom fyrir sameiginlega fund félagsmálanefndar og fjárlaganefndar í morgun til að ræða Byrgismálið. Birkir Jón Jónsson formaður fjárlaganefndar hefur vísað ábyrgðinni á Ríkisendurskoðun en dró aðeins í land í morgun og bætti jafnframt við að fleiri hafi misstigið sig í málinu.

Hann sagði jafnframt að fulltrúar félagsmálaráðuneytisins og fjármálaráðuneytisins yrðu kallaðir fyrir nefndina á morgun. Hann var enn og aftur spurður um sína ábyrgð á málinu því hann starfaði sem aðstoðarmaður félagsmálaráðherra þegar úttekt var gerð á fjármálum Byrgisins, úttekt sem sýndi að pottur var brotinn en hvorki fjárlaganefnd né Ríkisendurskoðun var gert viðvart.

Hann segir að eftir úttektina hafi átt að gera þjónustusamning sem forsvarsmenn Byrgisins hefðu ekki undirritað en það hafi hann ekki vitað enda þá kominn á þing. Eftir á að hyggja hefði hann átt að fylgja málinu betur eftir en það sé auðvelt að vera vitur eftir á. Hann hafi treyst þeim eftirlitsstofnunum sem hlut hafi átt að máli, það er félagsmálaráðuneytinu og Ríkisendurskoðun.