Át sautján metra af brenninetlu

Ellefta heimsmeistarakeppnin í brenninetluáti fór fram í enska smáþorpinu Marshwood á laugardaginn. Keppnin er haldin laugardag fyrir sumarsólstöður ár hvert, og dró í ár að sér keppendur alla leið frá Ástralíu og Rússlandi.

Netlurnar voru að sögn skipuleggjenda óvenjulega stórar og djúsí í ár, og þar með erfiðari viðureignar en venjulega. Það kom ekki í veg fyrir að Paul Collins, sigurvegari keppninnar, hesthúsaði lauf af meira en sautján metrum af brenninetlustilkum.

,,Mér líður æðislega, ég trúði því ekki að ég gæti orðið heimsmeistari í neinu" sagði Collins, grænmynntur eftir sigurinn.

Keppnin á rætur sínar að rekja til veðmáls sem Alex nokkur Williams, gerði árið 1990 um það að gæti einhver fundið hærri netlu en fimm metra hátt eintak hans, myndi hann éta hana. Hann neyddist svo til að gera einmitt það þegar bandarískt par á ferðalagi um sveitina fann stilk sem var rétt aðeins lengri.

Sjö árum síðar hóf kráareigandinn Shane Pym heimsmeistarakeppnina eins og hún er í dag.

Lauf brenninetla eru alsett litlum hárum sem stinga ógurlega strjúkist þau við húð. Það þarf því tækni til að koma laufunum niður án nístandi sársauka, en hún felst helst í því að drekka nóg, og rúlla laufunum vandlega saman.