Stjórnsýsluhúsið of lítið fyrir auglýsingar

Stjórnsýsluhús Hvalfjarðarsveitar er of lítið og því hefur verið ákveðið að deiliskipulagsauglýsingar, og aðrar sambærilegar auglýsingar, verði framvegis hengdar upp á skrifstofu skipulags- og byggingarfulltrúa í Miðgarði og hætt að hengja þær upp í stjórnsýsluhúsi Hvalfjarðarsveitar að Innrimel 3 í Melahverfi.

Fjallað er um málið á vefsíðu sveitarinnar og þar kemur fram að staðan er sú að stjórnsýsla Hvalfjarðarsveitar hefur aðsetur í litlu 60 fermetra sumarhúsi sem gegnir tímabundið hlutverki stjórnsýsluhúss. Ekki er pláss fyrir skipulags- og byggingarfulltrúann þar og hefur hann aðsetur í félagsheimilinu Miðgarði.

Í ljós hefur komið að hvorki er fyrir hendi veggpláss né borðpláss að Innrimel til þess að hengja upp auglýsingar af þessu tagi ásamt uppdráttum. Framvegis verður því hægt að skoða slíkar auglýsingar í Miðgarði. Það er þó háð því að byggingarfulltrúi sé á staðnum og það er hann yfirleitt fyrir hádegi á virkum dögum.