Norðmenn vilja kaupa beituverksmiðju

Hópur af norskum fjárfestum auk fulltrúa frá einu öflugasta matvælafyrirtækinu þar í landi munu koma hingað til lands í vikunni til viðræðna um kaup á beituverksmiðjunni í Súðavík. Ómar Már Jónsson sveitarstjóri Súðavíkurhrepps segir að íslenskir fjárfestar hafi ekki sýnt málinu neinn áhuga. Hinsvegar sjá Norðmenn mikla möguleika í fyrirtækinu.

"Það er ekkert fast í hendi hvað söluna á verksmiðjunni varðar en ljóst að mikill áhugi er af beggja hálfu fyrir þessum kaupum," segir Ómar Már. "Og það munar um minna fyrir Súðavík því verksmiðjan skapar sjö störf hér miðað við einfalda vakt og tólf störf miðað við tvöfalda vakt."

Starfsemi verksmiðjunnar hefur legið niðri um nokkurt skeið sökum skorts á rekstrarfé. Hún framleiðir beitu með nýrri aðferð sem hefur verið þróuð hérlendis, það er beitu sem pakkað er í poka. Hægt er að nota þessa aðferð einnig í matvælaframleiðslu og það eru Norðmennirnir einkum að horfa til. Eigendur verksmiðjunnar hafa einkaleyfi á framleiðsluaðferðinni í um 30 löndum og sótt hefur verið um einkaleyfið víðar.

Ómar er bjartsýnn á jákvæða niðurstöðu í viðræðunum við Norðmennina. "Þeir hafa ólíka afstöðu til þessarar verksmiðju en fjárfestar hér heima sem virðast ekki hafa séð möguleikana hér," segir Ómar Már.