Tölvupóstar frá svikahröppum sífellt grófari

Mörg þúsund tilkynningar hafa borist ríkislögreglustjóra það sem af er þessu ári vegna tölvupósta þar sem reynt er að hafa af fólki fé. Bréfin verða sífellt grófari að sögn aðstoðarríkislögreglustjóra og í þeim nýjustu er fólki hótað lífláti.

„Við vitum ekki til þess að nokkur Íslendingur hafi látið blekkjast af þessum tölvupóstum," sagði Páll Winkel, aðstoðarríkislögreglustjóri, í samtali við Vísi.

Ríkislögreglustjóri gaf í dag út viðvörun vegna tölvupósta þar sem einstaklingum er hótað lífláti greiði þeir ekki ákveðna upphæð inn á erlendan bankareikning. Um er að ræða póst sem kallast upp á ensku "hit man scam" eða "killer spam". Er fólk hvatt til að svara ekki þessum bréfum og hafa þess í stað samband við lögreglu.

Að sögn Páls hefur tilkynningum vegna svikapósta farið sífellt fjölgandi á undanförnum árum. Það sem af er þessu ári eru þær orðnar fjögur þúsund talsins. „Fólk er að fá alls konar tölvupóst frá svikahröppum. Hins vegar fór að bera á mun grófari bréfum í vor. Bréfum þar sem fólki er til dæmis hótað lífláti."

Páll segir að lögreglan skoði hvert tilfelli og sé einnig í samstarfi við erlend lögregluyfirvöld vegna tölvupósta frá svikahröppum. Hann hvetur fólk til að hafa samband við lögreglu ef þeim berst svikapóstur.