Sér fyrir endann á löngum frostakafla

Nú sér loks fyrir endann á þeim samfellda frostakafla sem verið hefur á landinu síðan 5. janúar. Suðrænt loft sækir nú að landinu og fer að hlýna, fyrst vestan til, seint á morgun og á þriðjudag ætti að vera orðið frostlaust víðast hvar á láglendi.

"Já nú er hæðasvæði að byggjast upp vestur af landinu sem ýta mun lofti ættuðu langt sunnan úr höfum upp að landinu" segir Sigurður Þ. Ragnarsson veðurfræðingur á Veðurstofu Stöðvar 2. "Það sem er nú einna jákvæðast í þessu er að þetta er ekki asahláka með roki og rigningu, heldur mjakast þetta loft með, jú vissulega ákveðnum vindi inn yfir land, en úrkoman verður, að mér sýnist í lágmarki" segir Sigurður. Hann segir að horfur séu á að hlýindin dvelji jafnvel í einhverja daga og því ætti að verða nokkur snjóbráð og stór hluti saltpækilsins á götunum að hreinsast.