Keflavíkurflugvöllur notaður sem umskipunarhöfn

Keflavíkurflugvöllur var um helgina notaður sem eins konar umskipunarhöfn fyrir flutning frá Texas til Sádi-Arabíu. Það voru Antonov-flutningavélar frá Rússlandi sem önnuðust flutninginn sem var sérhæfður búnaður til borunar eftir olíu.

Reyndar eru þessar vélar farnar að hafa tíðar viðkomur hér á landi og annast Vallarvinir afgreiðslu þeirra. Björn Ingi Knútsson, flugvallarstjóri á Keflavíkurflugvelli, sagði í viðtali við Víkurfréttir af þessu tilefni að Keflavíkurflugvöllur gæti orðið ákjósanlegur umskipunarflugvöllur í framtíðinni. Staðsetning mitt á milli Bandaríkjanna og meginlands Evrópu væri ákjósanleg í því tilliti.