120 vitni kölluð fyrir í aðalmeðferð Baugsmáls

Við fyrirtöku í morgun í Baugsmálinu, sem enn er komið í héraðsdóm, kom fram að vænta má þess að 120 vitni verði kölluð fyrir í aðalmeðferð málsins í næsta mánuði. Á þessu stigi málsins er verið að fjalla um ákæruliði sem áður hafði verið vísað frá héraðsdómi og Hæstarétti.

Þó að áfanganiðurstaða hafi orðið í Baugsmálinu á fimmtudag þegar Hæstiréttur sýknaði sakborninga af þeim ákæruliðum sem eftir voru af upphaflegri ákæru er Baugsmálinu langt í frá lokið.

Málið hófst með 40 ákæruliðum sem héraðsdómur vísaði öllum frá dómi. Þeim úrskurði var vísað til Hæstaréttar sem staðfesti frávísun 32 ákæruliða en sendi átta til efnismeðferðar í Héraðsdómi. Þar var sýknað á öllum póstum en sýknudómi sex ákæruliða var vísað til Hæstaréttar en þar var sýknað á öllum póstum á fimmtudag.

Settur saksóknari ákvað þó að endurákæra útfrá þeim 32 liðum sem var vísað frá en upp úr þeim voru soðnar 19 ákæruliðir sem eru nú komnir fyrir héraðsdóm.

Þeir sem eru ákærðir eru Jón Ásgeir Jóhannesson, aðaleigandi Baugs, Tryggvi Jónsson, fyrrverandi forstjóri fyrirtækisins og Jón Gerald Sullenberger, maðurinn sem kom málinu af stað í upphafi.

Hundrað og tuttugu vitni verða kölluð fyrir héraðsdóm í þessu máli en aðalmeðferð verður um miðjan febrúar.