Rætt um alþjóðlegan háskóla á Keflavíkurflugvelli

Alþjóðlegur háskóli, tengdur þekkingarsetri og rannsóknastofnunum, er meðal þeirra hugmynda, sem áhugi er á að gera að veruleika á Keflavíkurflugvelli.

Um yrði að ræða háskóla á alþjóðlegum markaði, ef svo má að orði komast, þar sem ekki yrði síður lögð áhersla á að laða að erlenda nemendur en íslenska. Í tengslum við skólann yrði safnað saman í þekkingasetur sem mest af sérþekkingu hér á landi, eins og til dæmis varðandi virkjun jarðhita og lífefnaiðnað úr sjávarfangi.

Þriðji liðurinn yrðu svo rannsóknastofnanir á ýmsum sviðum í nánum tengslum við þekkingasetrið og háskólann þannig að þessir þrír þættir byggðu hver annan upp.

Kjartan Þór Eiríksson, framkvæmdastjóri Þróunarfélags Keflavíkurflugvallar, segir að fleiri en einn hópur sé í fullri alvöru að skoða möguleika á viðamiklu skólahaldi á svæðinu.

Fleiri en einn hópur virðist líka hafa sterkan fjárhagslegan bakhjarl og óneitanlega falli slík starfssemi vel að þeim skilyrðum að nýting íbúðarhúsnæðis á svæðinu riðli ekki uppbyggingu annars staðar á Suðurnesjum. Viðræður væru enn í trúnaði og því væri ekki hægt að upplýsa hverjir ættu í hlut.