Þrír hafa gefið sig fram

Þrír menn af þeim fjórum sem gengu í gildru fréttaskýringaþáttarins Kompáss þegar þeir héldu sig vera að fara á fund þrettán ára stúlkubarns, hafa gefið sig fram við lögreglu. Enn er óljóst hvernig ákæruvaldið mun taka á málum mannanna.

Kompás lagði inn auglýsingu inn á vefinn Einkamál.is í nafni 13 ára stúlku til að leita svara við þeirri spurningu hvort menn sem hefðu samband við stúlkuna á Netinu myndu freista þess að koma á fund hennar. Í þættinum í gærkvöld mátti sjá fjóra menn ganga í þá gildru. Í þættinum voru andlit þeirra hulin.

Fyrir sýningu þáttarins fór lögregla fram á upplýsingar um það hverjir þessir fjórir menn væru og fékk í hendur myndskeið af þeim. Að sögn Björgvins Björgvinssonar aðstoðaryfirlögregluþjons eru þrír menn af þeim fjórum, sem sýndir voru við þá iðju að reyna að hitta barn í kynferðislegum tilgangi að þeir héldu, búnir að gefa sig fram við lögreglu.

Þeir verða yfirheyrðir en framhaldið er óljóst enda málið einstakt að því leiti að notast var við virka tálbeitu, sem lögreglu er óheimilt, og upplýsingar um mennina fengnar frá þriðja aðila.

Að sögn Boga Nilsson ríkissaksóknara má ætla að mál fjórmenningana muni rata til hans þar sem ákvarðað verði um framhaldið.