Mannekla og ófullnægjandi húsakostur hamlar starfsemi Landspítalans

Mannekla og og ófullnægjandi húsakostur hefur hamlað starfsemi Landspítalans háskólasjúkrahúss að sögn Birnu Kr. Svavarsdóttur, formanns stjórnarnefndar Landspítalans háskólasjúkrahúss. Þetta kom fram í ræðu hennar á ársfundi spítalans sem haldinn er í dag. Hún segir nauðsynlegt í ljósi breyttra aðstæðna í samfélaginu að skoða fleiri möguleika við fjármögnun og framkvæmd.

Í ræðu sinni sagði Birna aðstæður á spítalanum oft erfiðar og til dæmis gengi afar illa að manna í sérhæfð störf. Skortur sé á hjúkrunarfræðingum og sjúkraliðum og oft ekki hægt að halda úti fullri starfsemi á deildum spítalans vegna manneklu. Þá spilar þensla og launasamkeppni á vinnumarkaði inn í og gerir spítalanum erfitt að ná í starfsfólk

Birna sagði ennfremur í ræðu sinni að skortur á starfsfólki hefði neikvæð áhrif á starfsandann og auki vinnuálag. Þar að auki sé húsakostur ekki lengur í samræmi við kröfur nútímans. Hvetur hún landsmenn til að standa vörð um byggingu nýs spítala, starfseminni til hagsbóta og landsmönnum til heilla.

Birna bendir á í ræðu sinni að á Íslandi sé fyrir hendi öflugt heilbrigðiskerfi sem byggir á samfélagslegri ábyrgð þar sem heilbrigðisþjónusta er túlkuð sem mannréttindi og ráðist ekki af efnahag eða öðrum aðstæðum.

Hún segir Íslendinga standa frammi fyrir breyttum aðstæðum í samfélaginu. Aukin eftirspurn eftir heilbrigðisþjónustu hafi haft það í för með sér að álagið hafi aukist og þar með kostnaður. Þar af leiðandi sé það nauðsynlegt að skoða þá möguleika sem bjóðast við fjármögnun og framkvæmd heilbrigðisþjónustunnar.