Flugfreyja í sjöunda himni

Áströlsk flugfreyja hjá Quantas flugfélaginu er farin í felur meðan hún reynir að selja slúðurblöðum söguna af því þegar hún hafði samfarir við breska leikarann Ralph Fiennes á klósetti flugvélar í 35 þúsund feta hæð. Lisa Robertson segir einnig að hún hafi átt eldheita nótt með Fiennes á hótelherbergi hans. Hún hefur nú verið rekin frá Quantas.

Þessi saga stingur mjög í stúf við það sem Robertson sagði vinnuveitendum sínum fyrst eftir atburðinn. Þá sagði hún að Fiennes hefði elt hana inn á klósettið, en hún hefði fengið hann til þess að fara út aftur, án þess að nokkuð gerðist. Það var eftir að fjölmiðlar fóru að bera fé á flugfreyjuna að hún breytti sögu sinni. Hún hefur nú lýst því í smáatriðum hvernig hún tók í hönd hans og leiddi hann inn á klósettið, og hvað þar gerðist.

Vissir fjölmiðlar eru tilbúnir að greiða háar fjárhæðir fyrir slíkar sögur af frægu fólki. Ralpf Fiennes hefur ekki viljað tjá sig um frásögn flugfreyjunnar.