Dreggjum af svartolíu dælt úr Wilson Muuga

Þyrla frá Landhelgisgæslunni flutti í morgun dælur og mannskap út í Wilson Muuga á strandstað við Hvalsnes á Reykjanesi, til að dæla dreggjum af svartolíu úr lestum skipsins. Þar í grennd fannst olía í þanghrönn síðdegis í gær.

Svonefndur Irminger-straumur gæti hafa borið olíu þaðan í Garðssjó þar sem sjófuglar haf orðið fyrir olíumengun að undanförnu. Straumurinn, sem er tunga út Golfstraumnum, fer norður með Reykjanesinu og fyrir það í Garðssjóinn og svo veltur á vindáttum hvort olía getur borist alveg inn til Njarðvíkur.

Leiðangurinn í dag var ákveðinn í síðustu viku, þar sem nú er stórstreymt, en við þær aðstæður skapast annarsvegar hagstæð skilyrði til dælingar og hins vegar hætta á að olía leki úr skipinu þegar sjór vatnar undan því og þar með rifnum botngeymunum.

Fuglarnir tveir, sem náðust í fjörunni í Garði í gær, eru nú komnir í Húsdýragarðinn í Reykjavík þar sem sýni verða tekin af olíu í fiðri þeirra og þeir síðan hreinsaðir. Þá hafa menn frá Umhverfisstofnun Suðurnesja verið að kanna nánar olíuflekk sem fannst í þanghrönn í grennd við strandstað síðdegis í gær.