Mikil eftirspurn eftir stórum trjám

Mikil eftirspurn er eftir stórum trjám og gott verð í boði fyrir tré á borð við þau sem horfin eru úr Heiðmörk.

Stjórn Skógræktarfélags Reykjavíkur samþykkti einróma á fundi sínum í gærkvöldi drög að kæru á hendur Kópavogsbæ og verktakafyrirtækinu Klæðningu fyrir jarðrask og spjöll í Heiðmörk vegna lagningar vatnsleiðslu. Að teknu tilliti til ábendinga á fundinum í gærkvöldi verður gengið frá kærunni í dag og hún send lögreglu til meðferðar.

Eins og fram kom í gær var hluti trjánna, sem rifin voru upp vegna framkvæmdanna, fluttur á geymslusvæði í Hafnarfjarðarhrauni en stór hluti trjánna virðist vera horfinn. Þeirra á meðal nokkur stærstu trén.

Svo há tré eru ekki á hinum almenna markmaði en samkvæmt könnun fréttastofunnar í morgun er ekki ólíklegt að þau stærstu gæti farið á tugi þúsunda króna stykkið á svörtum markaði og heimildarmenn segja að enginn skortur væri á kaupendum.

Lögreglurannsókn, sem væntanlega hefst með tilkomu kærunnar, mun væntanlega leiða í ljós hvað varð af trjánum og hvort einhver hagnaðist af hvarfi þeirra.