Lýsa þungum áhyggjum af kjaradeilu kennara og launanefndar

Borgarmálaráð Samfylkingarinnar lýsir yfir þungum áhyggjum vegna þeirrar stöðu sem upp er komin í viðræðum kennara og launanefndar sveitarfélaganna. Þetta kemur fram í ályktun sem samþykkt var á síðasta fundi ráðsins.

Þar er enn fremur bent á að stutt sé síðan grunnskólabörn í Reykjavík hafi orðið af kennslu í margar vikur vegna kjaradeilu kennara og það sé afar brýnt að málsaðilar setji samskipti sín í aðdraganda næstu samninga í uppbyggilegan farveg sem líkegur er til árangurs. Skólahald í Reykjavík eigi mikið undir því að foreldrar, kennarar, launanefnd sveitarfélaga og sveitarstjórnarfólk um land allt skoði hug sinn til kennarastarfsins og framtíðarsýnar grunnskóla í Reykjavík. Þannig megi ná sátt um viðunandi laun kennara og vinnutímafyrirkomulag og ekki síður inntak og gæði náms.