Vonast til að auglýsing eftir staðgöngumóður verði til hagsbóta

Konan sem auglýsti eftir staðgöngumóður, segist gera það í kjölfar læknamistaka. Hún vonast til að umræðan um hennar mál leiði til lagabreytinga, öðrum til hagsbóta.

Par auglýsti í Morgunblaðinu 22. apríl síðastliðinn eftir staðgöngumóður, að fósturvísir frá parinu yrði notaður. Þar sem slíkt væri ekki löglegt hér á landi, yrði að gera aðgerðina erlendis. Þórður Óskarsson læknir og sérfræðingur hjá Art Medica sagði í fréttum Stöðvar 2 þann dag að hann væri þeirrar skoðunar að ekki væri rétt að taka fyrir þann möguleika að fólk geti eignast barn með þessum hætti og benti á að fyrir sum pör væri þetta eini möguleikinn.

Konan sem auglýsti eftir staðgöngumóðurinni sagði í samtali við Stöð 2 að þau hefðu ákveðið að reyna þessa leið eftir að mistök hafi verið gerð við fæðingu sonar þeirra hjóna, en þau leiddu til þess að leg konunnar var fjarlægt í kjölfarið. Að auglýsa eftir staðgöngumóður hafi verið einn möguleiki fyrir þau til að eignast fleiri börn. Hún sagðist vonast til að sú umræða sem varð í kjölfar auglýsingarinnar verði til þess að lögum um þetta verði breytt og muni því nýtast öðrum pörum sem eru í sömu aðstöðu og þau, í framtíðinni.

Hún segist hafa fengið góð viðbrögð við auglýsingunni, og vilja hjónin þakka þeim sem sýndu málinu áhuga og tóku þátt í umræðu um það. Konan segir ekkert hafi verið ákveðið eða frágengið um framhaldið. Varðandi hvar aðgerðin yrði gerð, nefndi hún Grikklandi sem möguleika, en þar væri væru svona aðgerðir heimilar.