Brotinn Vignir Snær en ekki beygður

„Ég datt í hálkunni fyrir utan upptökuverið mitt í morgun [gær] og braut bein í vinstri upphandlegg," segir Vignir Snær Vigfússon, gítarleikarinn góðkunni og tónlistarstjóri sjónvarpsþáttarins X-Factor. Vignir tók enga áhættu og hringdi á sjúkrabíl sem flutti hann á slysavarðstofuna þar sem gert var að brotinu.

„Ég er líka bara með þennan sígilda sársaukastuðul karla, er óttaleg kveif og þoli voðalega lítið," segir Vignir sem sat heima hjá sér, ber að ofan enda komst hann í enga flík sökum gifsins og á góðum verkjalyfjum. „Ég er nú reyndar búinn að vera ónýtur í hendinni undanfarna fjóra mánuði og hef látið líta á hana öðru hvoru en læknarnir hafa ekkert fundið. Kannski er þetta bara lán í óláni því nú verður kannski hægt að finna hvað er að," útskýrir Vignir.

Þetta eru eðlilega mjög erfið meiðsl fyrir Vigni sem þarf að hafa hendurnar í góðu lagi starfsins vegna. Varla má gefa út geisladisk hér á landi án þess að gítarleikarinn komi þar að og hann viðurkennir að þetta setji vissulega strik í reikninginn. „Reyndar get ég ennþá tekið upp og framleitt tónlist en það verður ögn erfiðara og nánast útilokað að slá á strengina næstu mánuði," segir Vignir.

Mesta áfallið er þó að geta ekki lengur spilað undir með húshljómsveitinni í X-Factor en Vignir telur sig hafa fundið góðan arftaka í Gunnari Þór úr Sóldögg.

„Hann er reyndar miklu betri gítarleikari heldur en ég," segir Vignir sem áfram mun þó aðstoða keppendurna í allri stúdíóvinnu.