Njóta stuðningsins

Fegurðarsamkeppnin Ungfrú Vesturland fór fram á Akranesi um síðustu helgi. Svo skemmtilega vildi til að stúlkurnar sem lentu í þremur efstu sætunum eru bestu vinkonur til margra ára. Agla Harðardóttir hreppti titilinn, Helena Rúnarsdóttir lenti í öðru sæti og það þriðja hlaut Fríða Ásgeirsdóttir.

„Ég og Helena fluttum upp á Skaga árið 2000, þegar við vorum í sjöunda bekk,“ útskýrði Agla. Þar kynntust þær Fríðu, og ekki leið á löngu þangað til að stelpurnar smullu saman. „Við urðum bestu vinkonur í áttunda bekk,“ sagði Agla. Vináttuböndin hafa ekki slitnað með árunum heldur. „Vinkonur fjarlægjast nú samt oft aðeins við að byrja í samböndum,“ sagði Agla.

Ákvörðunin um að taka þátt í keppninni var þó ekki tekin í sameiningu. „Nei, það hittist bara einhvern veginn þannig á, sem var náttúrlega frábært,“ sagði Agla. Henni þótti ekki erfiðara að keppa á móti vinkonum sínum en öðrum í hópnum, og sagði engum ríg hafa verið fyrir að fara. „Nei, alls ekki,“ sagði hún og hló við. „Hópurinn var allur rosalega góður,“ bætti hún við.

Stúlkurnar sem lenda í efstu sætunum þremur keppa í Ungfrú Ísland 2007 síðar í vor. Agla kveðst mjög ánægð með að fá að undirbúa sig í félagsskap vinkvenna sinna, og njóta stuðnings þeirra. „Við erum rosalega ánægðar með að fá að fara í keppnina saman,“ sagði hún.