Einn í haldi vegna fjölda innbrota - fleiri ákaft leitað

Karlmaður á þrítugsaldri var í Héraðsdómi Suðurlands í dag úrskurðaður í þriggja vikna gæsluvarðhald vegna gruns um aðild að fjölda innbrota í Árnes- og Rangárvallasýslum síðustu daga.

Lögreglan á Selfossi vinnur að rannsókn þessara mála.

Maðurinn var handtekinn að morgni 29. nóvember, er komið var að honum sofandi ölvunarsvefni á innbrotsvettvangi. Fljótlega náði lögreglan að mynda tengsl við fjölda innbrota sem tilkynnt hafði verið um daginn áður í Árnes- og Rangárvallasýslum.

Talið er fullvíst að fleiri aðilar tengist málinu og er þeirra ákaft leitað.

Í tengslum við rannsókn málsins lýsir lögreglan á Selfossi eftir sendibifreið af gerðinni Renault Master, hvítri að lit, árgerð 2007 Sendibifreiðin ber skráningarmerkið TV-Z28, hugsanlega hefur þó verið skipt um skráningarmerki á bifreiðinni.