Tískulína frá Timberlake

Justin Timberlake var mættur í Harvey Nichols í New York í fyrradag þar sem ný tískulína frá honum var kynnt. Aðdáendur flykktust að í von um að líta stjörnuna augum en ásamt Justin hannar vinur hans Trace Ayala línuna sem ber heitið William Rast.

Fullt af öðrum stjörnum mættu til að kíkja á flíkurnar en þarna voru meðal annars flottar fyrirsætur eins og Lily Cole, Petra Nemcova, Olivia Inge og Jamie Gunns. Þarna var líka Amy Sacco, drottning næturlífsins í New York, en hún er eigandi tveggja heitustu næturklúbbanna í borginni; Lot 61 og Bungalow 8. „Ég er að vinna á klúbbnum mínum, Bungalow 8. En ég bara varð að kíkja við til þess að heilsa upp á vin minn, Justin,“ sagði hún töffaralega.