Nýr rektor tekur við boðkeflinu í Háskólanum í Reykjavík

Dr. Guðfinna S. Bjarnadóttir flutti síðasta ávarp sitt sem rektor Háskólans í Reykjavík og í lok útskriftarathafnar í skólanum í dag. Bjarni Ármannsson, formaður Háskólaráðs, leiddi svo fráfarandi rektor og hinn nýja rektor skólans, dr. Svöfu Grönfeldt, saman og Guðfinna afhenti Svöfu boðkefli til marks um að hún væri tekin við stjórn skólans. Fullur salur Háskólabíós þakkaði Guðfinnu vel unnin störf í þágu skólans undanfarin 8 ár með standandi lófataki og bauð hinn nýja rektor velkominn til starfa.

257 nemendur voru brautskráðir frá Háskólanum í Reykjavík í dag, laugardaginn 20. janúar 2007.

Úr Lagadeild útskrifuðust 17 nemendur, úr Viðskiptadeild 129 nemendur, 79 nemendur útskrifuðustu úr Tækni- og verkfræðideild og 32 voru brautskráðir af Frumgreinasviði.

Rúm 60 prósent útskrifaðra nema eru karlar og tæp 40% konur. Elsti nemandinn í hópnum er 56 ára og lauk BS prófi í viðskiptafræði og yngsti nemandinn sem útskrifaðist með 3ja ára háskólagráðu er 22ja ára. Meðalaldur útskriftarnema er tæplega 32 ár.

Brautskráningin fór fram í Háskólabíói og var afar hátíðleg. Sigrún Hjálmtýsdóttir, sópran söng ásamt Vox Feminae kórnum undir stjórn Margrétar Pálmadóttur.