Ólafur Ólafsson og eiginkona hans gefa milljarð króna

Ólafur Ólafsson, stjórnarformaður Samskipa, og eiginkona hans, Ingibjörg Kristjánsdóttir landslagsarkitekt, kynntu í morgun að þau hefðu stofnað velgerðarsjóð og lagt honum til einn milljarð króna í stofnframlag. Tekjum sjóðsins verður varið til ýmissa verkefna í þróunarlöndum og til að göfga mannlíf á Íslandi, að því er fram kemur í fréttatilkynningu.

Áætlað er að árlega verði til ráðstöfunar 100-150 milljónir króna. Auk þeirra hjóna sitja í stjórn Sigurður Einarsson, stjórnarformaður Kaupþings, Sigurður Guðmundsson landlæknir og Þórunn Sigurðardóttir, listrænn stjórnandi Listahátíðar í Reykjavík og stjórnarmaður í UNICEF á Íslandi. Sjóðsstofnunin nú er í beinu framhaldi af tveimur verkefnum sem hjónin hafa stutt með á annað hundrað milljónum króna en þau eru menntaverkefni í Síerra Leóne og Landnámssetrið í Borgarnesi.