Skemma eyðilagðist í veðurofsa

Skemma við bæinn Fell í Kollafirði eyðilagðist í veðurofsa í dag. Björgunarsveitin Dagrenning á Hólmavík var kölluð út á fjórða tímanum þar sem þakplöturnar voru byrjaðar að losna. Þegar björgunarsveitarmenn komu á staðinn hafði ástandið versnað og þakið fauk fljótlega af. Í tilkynningu frá slysavarnarfélaginu Landsbjörg segir að skemman sjálf hafi svo sprungið í veðurofsanum.

Björgunarsveitarmenn festu ásamt bændum á svæðinu niður hluti úr skemmunni til að koma í veg fyrir fok og rifu þeir einnig niður þá veggi sem eftir stóðu. Á Felli í Kollavík er ekki búskapur en þar er rekið heimili fyrir fatlaða einstaklinga. Enginn var heima við þegar skemman fauk en bændur í nágrenninu kölluðu eftir aðstoð björgunarsveitamanna.