Taprekstur eykst ár frá ári

Ríkisútvarpið eyddi tæpum hálfum milljarði umfram heimildir á hálfs árs tímabili í fyrra. Taprekstur stofnunarinnar hefur margfaldast á tveimur árum. Þingmenn spurðu í dag hvað hefði verið að gerast í útvarpinu. Menntamálaráðherra var gagnrýndur fyrir að leyna upplýsingum um fjárhagsstöðu stofnunarinnar í dag en svar við fyrirspurn um hallarekstur stofnunarinnar barst ekki fyrr en klukkustund áður en greiða átti atkvæði um frumvarp um Ríkisútvarpið ohf.

Í fjárlögum er heimild til að fella niður skuldir Ríkisútvarpsins upp á 625 milljónir.Alls nema skuldirnar nú rúmum fimm milljörðum, þrír komma þrír milljarðar eru langtímaskuldbindingar, þar af þrír milljarðar skuld við Lífeyrissjóð starfsmanna Ríkisins. Ríkisútvarpið tapaði 50 milljónum árið 2004, tæpum 200 milljónum árið 2005 en fyrstu sex mánuði ársins í fyrra tapaði það 420 milljónum. Stjórnarandstaðan krafðist þess að atkvæðagreiðslu um Ríkisútvarpið yrði frestað vegna málsins, þar sem hún þyrfti tíma til að skoða þessar upplýsingar nánar. Því hafnaði forseti þingsins og sagði frumvarpið útrætt. Frumvarpið um Ríkisútvarpið var samþykkt með tuttugu og níu atkvæðum gegn tuttugu og einu.