RÚV-frumvarpið samþykkt á Alþingi

23. janúar 2007 15:01

Frumvarp um Ríkisútvarpið var samþykkt á Alþingi laust eftir klukkan þrjú með 29 atkvæðum stjórnarliða gegn 21 atkvæði stjórnarandstöðu í kjölfar háværra umræðna um fjárhagsstöðu stofnunarinnar.

Tillaga stjórnarandstöðunnar um að frumvarpinu yrði vísað frá var hins vegar fellt með 29 atkvæðum til 22 og sömuleiðist tillaga um að fresta gildistöku laganna fram yfir kosningar. Fjölmargir þingmenn tóku til máls og gerðu grein fyrir atkvæði sínu og skiptust stjórn og stjórnarandstaða þar í tvær fylkingar í afstöðu sinni til frumvarpsins.

Fram kom í máli stjórnarandstæðinga að þeir teldu að staða stofnunarinnar yrði ekki sterkari með samþykkt laganna. Ætlunin væri að koma stofnuninni í hendur alráðs útvarpsstjóra sem stjórnaði í umboði ríkisstjórnar og myndi rýra kjör starfsmanna. Enn fremur væri um að ræða einkavæðingu sem væri undanfari sölu RÚV. Þá gerði frumvarpið ráð fyrir því að þeir sem aðeins hefðu fjármagnstekjur greiddu ekki nefskatt til RÚV.

Stjórnarliðar sökuðu stjórnarandstæðinga um óbilgirni í sínum kröfum í tengslum við frumvarpið og um að vera ómálefnalega. Þá spáði Guðni Ágústsson landbúnaðarráðherra því að Ríkisútvarpið yrði aldrei selt þar sem þjóðin vildi hafa þjóðarútvarp í ríkiseigu. Ríkisútvarpið mætti ekki vera eins og hestur í hafti þegar allir viti að rekstur útvarps og sjónvarp er kapphlaup. Frumvarpið væri stofnuninni til heilla.

Svo háværar voru umræðurnar á tímabili að forseti Alþingis, Sólveig Pétursdóttir, mátti slá í þingbjölluna af miklum móð til þess að fá hljóð í þingsal. Hafði hún á orði að það færi að stórsjá á bjöllunni ef hlutir færu ekki að róast á þingi.

Áður en til atkvæðagreiðslunnar kom var vakin athygli á svari menntamálaráðherra við fyrirspurn Kolbrúnar Halldórsdóttur, Vinstri - grænum, um fjárhagsstöðu Ríkisútvarpsins. Í svarinu kemur fram að halli stofnunarinnar á fyrri helmingi síðasta árs hafi verið 420 milljónir og að uppsafnaðar skuldir fyrirtækisins væru 5,2 milljarðar. Til samanburðar var halli á rekstri RÚV tæpar 50 milljónir árið 2004 og tæpar 200 milljónir árið 2005

Mest lesið

Fleiri fréttir