Ólafur Ragnar þiggur sæti í Þróunarráði Indlands

Ólafur Ragnar Grímsson, forseti Íslands, hefur þegið sæti í Þróunarráði Indlands. Ráðinu er ætlað að móta tillögur um hvernig Indverjar geta styrkt efnahagslíf sitt og velferð þjóðarinnar án þess að umhverfi bíði varanlegt tjón af eða að gæðum náttúrunnar verði stefnt í hættu.

Þróunarráðið hélt sinn fyrsta fund í Delhi á Indlandi í gær. Ráðið skipa þekktir vísindamenn, sérfræðingar, stjórnendur rannsóknarstofnana og forystumenn á alþjóðavettvangi ásamt áhrifamönnum í indverskum þjóðmálum.

Á heimasíðu forseta Íslands er greint frá að á meðal þeirra verkefna sem Þróunarráðið mun fjalla um á næstunni er vatnsbúskapur Indverja. Bráðnun jökla og íss í Himalayafjöllum ógnar lífskjörum hundruða milljóna Indverja.