Gæsluvarðhald yfir síbrotamanni fellt úr gildi

Hæstiréttur Íslands felldi í dag úr gildi gæsluvarðhaldsúrskurð yfir síbrotamanni. Maðurinn var um miðjan desember dæmdur í fimm ára fangelsi fyrir nytjastuld, skjalafals, þjófnaði og fleira. Gæsluvarðhaldsúrskurðurinn var felldur úr gildi vegna tæknilegra atriða.

Í dómi Hæstaréttar segir að ríkissaksóknari hafi áfrýjað málinu 9. janúar síðastliðinn en lögreglustjórinn á höfuðborgarsvæðinu sótti ekki um áframhaldandi gæsluvarðhald fyrr en degi síðar. Með áfrýjuninni hafi málið færst til ríkissaksóknara og lögreglustjórinn á höfuðborgarsvæðinu gat þar með ekki sótt um gæsluvarðhaldið.

Sakaferill mannsins er langur og nær aftur til ársins 1982. Vegna ítrekaðra brota sinna var hann settur í síbrotagæslu þann 15. september á síðasta ári.