Samgöngubætur hækka fasteignaverð og lækka vöruverð

Á ráðstefnu samgönguráðs í dag kynnti Vífill Karlsson, dósent við Háskólann á Bifröst, rannsóknir á áhrifum samgöngubóta á byggð hérlendis. Hann segir að samgöngubætur hafi veruleg áhrif á búsetuskilyrði og búsetuþróun byggða, bæði borga, smærri bæja og dreifbýlis. Einhver skýrustu dæmin hérlendis eru jarðgöng, sem stytt hafa leiðir og aukið öryggi. Áhrif Hvalfjarðarganga höfðu þannig veruleg áhrif á Vesturlandi, þar sem fasteignaverð hækkaði mikið, atvinnutækifærum fjölgaði, atvinnuöryggi jókst, vöruverð lækkaði, vöruúrval jókst og aðgengi að opinberri þjónustu batnaði ásamt fleiru.

Og þetta eru áhrif sem munar um. Fasteignaverð á Vesturlandi hækkaði þannig beinlínis vegna Hvalfjarðarganga um 15-18%, sem talið er varlega áætlað.

Vífill segir að samgöngubætur séu forsenda þess að hægt sé að þróa byggðir í góðum tengslum við nútímasamfélag.