Vilja að stofnað verði sérstakt menningarráðuneyti

Bandalag íslenskra listamanna vill að stofnað verði sérstakt menningarráðuneyti þar sem margt bendi til þess að verðmætasköpun framtíðarinnar verði hvað mest í hinum skapandi atvinnugreinum. Ályktun þessa efnis var samþykkt á aðlfundi bandalagsins um síðustu helgi. Í ályktuninni segir enn fremur að það sé löngu tímabært að mikilvægi lista í íslensku samfélagi verði viðurkennt.

Þá vill bandalagið að listamönnum á starfslaunum verði fjölgað. Fjöldinn hafi staðið í stað í heilan áratug á meðan þjófélagið hafi tekið örum breytingum og landsmönnum til að mynda fjölgað um 13 prósent.

Bandalag íslenskra listamanna skorar enn fremur á stjórnvöld að viðurkenna hugverk sem eign sem lúti sömu lögmálum og aðrar eignir á borð við húsnæði, hlutabréf og kvóta og beri samkvæmt því 10 prósenta fjármagnstekjuskatt.