Ráðherrar sakaðir um að lítilsvirða þingið

Þingmenn stjórnarandstöðunnar mótmæltu því harðlega í morgun að stefnumótun ríkisstjórnarinnar í innflytjendamálum yrði ekki tekin til meðferðar í þinginu. Þingmaður Samfylkingarinnar sagði þetta lítilsvirðingu við þingið og þingflokksformaður Vinstri - grænna sagði óþolandi að ráðherrar ríkisstjórnarinnar breyttu ráðuneytum sínum í kosningaskrifstofur þegar alþingiskosningar væru í nánd.

Þingmenn stjórnarandstöðunnar fögnuðu því að stefnumótun lægi fyrir en hún var kynnt í gær. Þá gagnrýndu þeir jafnframt að henni fylgdi ekki framkvæmdaáætlun. Enn fremur brugðust þeir reiðir við því að að ekki ætti að taka málið til þinglegrar meðferðar.

Félagsmálaráðherra og menntamálaráðherra töldu ekki ólíklegt að það mætti kynna málið fyrir þinginu með einhverjum hætti, til að mynda sem skýrslu. Það þótti þingmönnum ekki nóg og sakaði Jóhanna Sigurðardóttir, þingmaður Samfylkingarinnar, ráðherrana um að lítilsvirða þingið með því að setja málið ekki í þinglega meðferð.