Árleg tískuhátíð í líkingu við Airwaves

Basecamp og Eskimo standa fyrir viðamikilli tískusýningu í næstu viku, sem vakið hefur áhuga erlendra fjölmiðla. „Þetta er í fyrsta skiptið sem við gerum eitthvað þessu líkt,“ sagði Andrea Brabin, framkvæmdastjóri Eskimo. „Þetta er ekki Icelandic Fashion week eða neitt í þá áttina. Við erum frekar að lyfta fram grasrótarhönnuðum, sem eru að byrja,“ sagði hún.

Hönnuðirnir eru Aftur, Eygló, Raxel, Starkiller, Ostwald og Forynja. Á sama tíma kynnir Eskimo sextán nýjar fyrirsætur til leiks, undir yfirskriftinni Faces of the year. „Þær sýna föt hönnuðanna,“ útskýrði Andrea. Áherslan er lögð á allt nýtt og ferskt, að sögn Andreu. „Hljómsveitirnar Steed Lord og Sometime spila, en þær eru báðar að gefa út sínar fyrstu plötur á árinu. Við erum svolítið að sýna fram á tenginguna á milli tónlistar og tísku líka. Þetta er eiginlega allt orðið eitt batterí: tónlistarmenn sitja fyrir í tískublöðum og svona,“ sagði hún. „Við stefnum líka að því að þetta verði árlegur viðburður, svipað og Airwaves er fyrir tónlistina.“

Á sýningunni verða útsendarar frá mörgum helstu módelskrifstofum heims og eins hafa tímarit á borð við Dazed and Confused og i-D sýnt mikinn áhuga á viðburðinum. „Margir erlendir fjölmiðlar hafa verið mjög spenntir fyrir því að koma, en maður fær aldrei staðfestingu fyrr en á síðustu stundu,“ varaði Andrea við. Miða á sýninguna má nálgast á miði.is.