Nýr orkuskóli tekur til starfa

Reykjavik Energy Graduate School of Sustainable Systems, orkuskóli á framhaldsstigi í eigu Orkuveitu Reykjavíkur, Háskóla Íslands og Háskólans í Reykjavík, tók til starfa með formlegum hætti í dag. Viðstaddir opnunina voru meðal annars forseti Íslands og borgarstjórinn í Reykjavík sem ávörpuðu málþing sem haldið var í tilefni opnunarinnar.

REYST er skammstöfun á heiti skólans og er reiknað með að kennsla þar hefjist næsta haust. Skólinn verður til húsa í höfuðstöðvum Orkuveitu Reykjavíkur og þar mun íslenskum og erlendum stúdentum standa til boða framhaldsnám á háskólastigi í orkuvísindum þar sem grunnþættirnir eru náttúra, tækni og markaður. Aðaláherslan verður þó á þau svið þar sem Íslendingar hafa samkeppnisforskot, það er í jarðhitavísindum, eftir því sem segir í tilkynningu Orkuveitu Reykjavíkur.

Háskólarnir tveir eru faglegir bakhjarlar skólans og munu nemendur einnig njóta faglegrar þekkingar innan Orkuveitu Reykjavíkur auk þess sem fyrirtækið er fjárhagslegur bakhjarl skólans.