Geri grátbað um fyrirgefningu

Geri Halliwell grátbað Victoriu Beckham um fyrirgefningu vegna þess hvernig hún yfirgaf hinar Kryddpíurnar á sínum tíma, sem síðar átti eftir að leiða til upplausnar stúlknasveitarinnar í heild sinni. Afsökunarbeiðnin kom fyrst frá Geri árið 2004 en það var ekki fyrr en nú sem Victoria ákvað að samþykkja hana. Þessar sögulegu sættir urðu til þess að Kryddpíurnar hafa komið saman að nýju. Þessu er haldið fram í enska götublaðinu The Sun í gær.

Að sögn heimildarmanna blaðsins hefur Victoria einhverja hluta vegna litið á brottför Geri sem persónuleg svik frá upphafi. Victoria er aukinheldur sögð afar langrækin og hafði hún áður sagt að hún myndi aldrei fyrirgefa Geri fyrir framkomu sína. Sárin hafa hins vegar greinilega gróið með tímanum og fór vel með á þeim stöllum þegar tilkynnt var um fyrirhugaða heimsreisu Kryddpíanna í lok árs.

„Geri vissi alveg hvernig hægt væri að sættast við Victoriu. Hún brotnaði niður fyrir framan Victoriu, baðst afsökunar fyrir að hafa yfirgefið hljómsveitina með þeim hætti sem hún gerði og nánast grátbað hana um fyrirgefningu,“ segir ónefndur heimildarmaður við The Sun sem þekkir til stúlknanna. „Til að bæta ofan á dramatíkina lét Geri Victoriu vita hvað hún hefði verið einmana og ringluð á þessum tímapunkti og á endanum fór Victoria að finna til með Geri. Þetta leiddi síðan til sáttanna nú,“ sagði hann enn fremur.