Vill að Seðlabankinn lækki stýrivexti

Seðlabankinn verður að lækka stýrivexti og hætta stuðningi sínum við alltof hátt gengi krónunnar að mati framkvæmdastjóra Samtaka atvinnulífsins. Hann segir vaxtastefnu bankans hafa lítil áhrif á þróun verðbólgunnar og vinni gegn því að krónan virki eðlilega sem sjálfstæður gjaldmiðill. Mikilvægasta mótvægisaðgerðin fyrir sjávarútveginn og landsbyggðina er lægra gengi krónunnar að hans mati.

Í yfirlýsingu sem Vilhjálmur Egilsson, framkvæmdastjóri Samtaka atvinnulífsins, birtir á heimasíðu samtakanna kemur fram að mikilvægasta mótvægisaðgerðin fyrir sjávarútveginn í kjölfar minnkun aflaheimilda sé að gengi krónunnar tryggi eðlilega samkeppnisstöðu útflutnings- og samkeppnisgreina.

Að mati Vilhjálms hefur vaxtastefna Seðlabankans þveröfug áhrif. Hann segir eðlilegt að krónan lækki þegar búist er við verulegum samdrætti þjóðarútgjalda og sjávarútvegurinn fái á sig mikinn aflasamdrátt. Gagnrýnir hann Seðlabankann og vill að bankinn hætti að reyna að beita gjaldmiðlinum sem miðlunartæki peningastefnunnar.

Sjá nánar yfirlýsing Vilhjálms.