Hartnett og Christensen nýjasta parið

Nýjasta parið í stjörnuheiminum eru leikarinn Josh Hartnett og danska ofurfyrirsætan Helena Christensen. Talsmenn þeirra beggja neita að sjálfsögðu orðrómnum. Sagan segir að Helena Christensen hafi ætlað sér að koma Hartnett og vinkonu sinni, Rosario Dawson, saman.

„Áður en Helena náði að koma þeim saman lét Josh hana vita það að hann hefði mestan áhuga á að hitta hana sjálfa,“ sagði í blaðinu National Enquirer. „Nú hefur Helena lofað Rosario að finna einhvern jafngóðan handa henni svo þau geti farið á tvöfalt stefnumót.“

Christensen virðist vera ágætlega virk í ástarmálunum því hún hætti nýlega með Jack Huston, frænda Anjelicu Huston, til þess að geta hitt Guy Berryman, bassaleikara Coldplay.