Eiður Smári færði frúnni nýjan bíl

Eiður Smári Guðjónsson, leikmaður Barcelona og fyrirliði íslenska landsliðsins í fótbolta, kom eiginkonu sinni á óvart í annað sinn á fáum dögum um helgina. Ragnhildur Sveinsdóttir, kona Eiðs, varð þrítug á sunnudaginn og á afmælisdaginn færði Eiður henni glænýjan bíl að gjöf. Bíllinn er af gerðinni Mini Cooper, svartur að lit og kostar að líkindum á bilinu 3-4 milljónir króna.

Eins og Fréttablaðið greindi frá um helgina hélt Eiður Smári óvænta afmælisveislu fyrir Ragnhildi á fimmtudagskvöld í garðinum við hús þeirra í Fossvoginum. Það var Sverrir Þór Sverrisson, Sveppi, sem skipulagði veisluna fyrir vin sinn. Meðal þeirra sem skemmtu í veislunni voru Stefán Hilmarsson, Björn Jörundur Friðbjörnsson og Jón Ólafsson auk systranna í Hara-flokknum. Grillmatur var á borðum í veislunni og þjónar sáu um að skenkja gestum víni eftir þörfum.