Kompás afhendir lögreglu umbeðin gögn

Fréttastofa Stöðvar tvö afhendir lögreglu í dag gögn, sem lögregla telur sig þurfa, til að bera kennsl á fimm einstaklinga sem myndaðir voru í tengslum við umfjöllun Kompáss um karlmenn sem leita eftir samneyti við börn í gegnum Netið. Samkvæmt starfsreglum fréttastofunnar eru vinnugögn almennt ekki afhent utanaðkomandi aðilum en undantekning er gerð vegna alvarleika málsins og ríkra almannahagsmuna.

Samkvæmt starfsreglum fréttastofunnar eru vinnugögn almennt ekki afhent utanaðkomandi aðilum. Í bréfi sem lögreglu var sent í dag kemur fram að undantekning sé gerð vegna alvarleika þessa máls. Einungis er um að ræða gögn sem hjálpa lögreglu við að hafa uppi á viðkomandi einstaklingum, enda vitnar lögregla til ríkra almannahagsmuna. Afhentar eru myndir og útskriftir á samskiptum við mennina. Önnur gögn, sem gætu til dæmis vísað á heimildarmenn eða fórnarlömb níðinga, verða ekki afhent.

Í Kompás þættinum, sem sýndur verður á sunnudag, kemur fram að rúmlega 100 einstaklingar höfðu samband við tálbeitu Kompáss, sem sagðist vera 13 ára stúlka. Fimm þeirra heimsóttu íbúð þar sem þeir héldu að stúlkan biði eftir þeim. Andlit þessara manna verða afmáð í þættinum en ekki í gögnum þeim sem afhent verða lögreglu í dag.